Actualitats
Lance Armstrong pòt pèrdre totes los títols e èsser sancionat a perpetuitat
Lo ciclista estatsunidenc quita la longa corsa judiciala per dopatge
Lo ciclista estatsunidenc Lance Armstrong, ganhant de sèt Torns de França, a decidit de quitar la siá lucha judiciària per que se retiren las acusacions de dopatge que carga dempuèi un decenni. Amb aquela decision, doncas, l’Agéncia d’Antidopatge dels Estats Units (USADA) lo pòt sancionar a perpetuitat, e a l’encòp, el pòt pèrdre los sèt Torns de França, la medalha de bronze dels Jòcs Olimpics de Sydney de 2000 e totes los títols ganhats dempuèi agost de 1998.
“Arriba un moment, dins la vida de tot òme, que cal dire pro”, çò anoncièt lo ciclista dins un comunicat. Armstrong venquèt un càncer e ara es president de la fondacion Livestrong.
“Ai captengut las acusacions segon las qualas gafinhèri e participèri amb d’avantatge quand ganhèri los sèt Torns de França dempuèi 1999; e lo prètz qu’aquò a supausat per la miá familha e pel prètzfach de la miá fondacion me pòrta ont soi ara: a metre fin a aquela conariá”. Pel ciclista texan, l’acusacion es “una caça de bruèissas inconstitucionala” e manten la siá innocéncia.
L’USADA sosten qu’Armstrong, qu’a 40 ans, tenguèt un sistèma de dopatge sistematic dempuèi 1999 fins a 2005. Lo 29 de junh, aquela institucion s’acordèt a l’unanimitat per presentar d’acusacions formalas de dopatge contra Armstrong e contra los mètges Pedro Celaya Lezema e Luis García del Moral, l’entraïnaire Pepe Martí, l’assistent medical Michele Ferrari e lo director esportiu Johan Bruyneel.
La renóncia a presentar recors a las acusacions favorizarà la suspension a perpetuitat d’Armstrong e aquò es lo primièr pas per li tirar los sèt Torns de França e mai de títols. Ara cal saber lo vejaire de l’Union Ciclista Internacionala, qu’aviá portat sosten a Armstrong per que se defendèsse de las acusacions de dopatge. Caldrà saber tanplan çò que ne dison los organizaires de la corsa francesa.
Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.
Lo torn de las colonias francesas — e pretendut "de France" —, non es pas brica una competicion de ciclisme. Fa plan temps ja (tostemps benlèu !) que non es pas res mai qu'una competicion de farmacologia. E qué ne vira dels Jòcs Olimpics, de las copas del mond de qué te sabi ? Se Poiriá fòrt plan que foguèsse exactament çò meteis. Disètz "competicion" ? Parlatz-ne als laboratòris…
Fin finala lo Lance Armstrong es descasut de sas set victòrias dins la virada dita de França entre 1999 e 2005. Una pichona question : serà parièr pel Miguel Indurain e pel Bernard Hinault (5 victòrias) e tant d'autres venceires coma Fignon, Pantani etc ... ?
Per acabar una frasa del correire francés Jacques Anquetil (primièr a 5 victòrias) dita a de jornalistas dins las annadas 1960 "Cal èsser un nèci o un falsièr per s'imagenar que podèm correr 265 jorns per an sens estimulants"
lo 13 de julh de 1967 - 45 ans fa - lo "paure" Tom Simpson se morissia pels penjals del Mont Ventorn de tant qu'èra cargat de potingas
Quna pietat de veire tot aquel monde (del mitan ciclista mai que mai) dire qu'un trichaire èra un grand esportiu !
Polit exemple de las valors supausadas de l'espòrt de respècte, ....
Vòstre comentari es a mand d’èsser validat. Per terminar lo procès de validacion, vos cal encara clicar sul ligam qu’anatz recebre per e-mail a l’adreiça qu’avètz indicada.
Escriu un comentari sus aqueste article
Senhala aqueste comentari